اسلایدر

  اوزون دریا

  الآمان، سركش اولوب، گونده بیر احواله دوشن دؤوری-قضانین بو د ل ازار، جفاكار، موخالیف عملیندن كی، یاخیب عالمی ناره، قویوب آواره، خوصوصن منی-بیچاره كی، همواره یانیب نئی كیمی اودلاره، بئله جوش و خوروش ائیله ییرم، سانكی سماواره دؤنن قلبیمه مینلرجه شراره وورولوب، اشكی-تریم جاری اولور كاسئیی-چئشمیمدن،

آمان، باری-خودایا، بو نه سوزیش كی، دوشوب جیسمی-نزاره، دیلی-زاره، كیم ائدر دردیمه چاره كی، گلیب عرصه یه تازه اوخوموش بیر نئچه پاره عرفاوو اودبالر كی، قویوب بدعته عئلم آدینی ترغیب و تحریص ائله ییرلر بیزی اول امری-شنیعه، یئنه بونلار نه دئسه عئیب ائله مز، چونكی گئدیب عئلم اوخویوب، كورسو تامام ائیله ییب، آز-چوخ نه اولا كسب-مراتیب ده ائدیبلر؛ آ كیشی، تنگه گتیردی منی، واللاهی بو ناققال شورالر، هدرندن-پدرندن، نه بیلیم بویمادرندن، نئجه سرسم دانیشیرلار، نه ایش اولسا قاریشیرلار، نئجه عئیب آختاریشیرلار، نئجه گؤر یولدان آزیرلار، نه گؤرورلرسه یازیرلار، نئجه حؤرمتلی  " قریب "  اولسا دا فورا تانیشیرلار؛ قولاغیم باتدی، نه چوخ-چوخ دانیشیرلار، بو نه مكتب، نه مكاتیب، نه مراتیب، بیزه بونلار نه موناسیب، عجبا، جددله اجدادیمیزین ایرثی اولوب بیزلره میراث-حقیقی قالان عادات و-الامات ایله امالیمیزی، حالیمیزی، جومله بو افالیمیزی شعرله تغییر و تبدیل ائلمك فیكری-شنیینده اولوب، بیزلری هر بیدعته ایغفال ایله اییصال ائله ییرلر كی، آپار اوغلونو وئر اوشقولا موللاسینا، اَیلش بالاوین یاسینا، باخ بیرجه سن آللاه،بولارین وئردیگی  فیتواسینا: یعنی اؤز الینله ائله اؤولادینی بیر روس، سد افسوس كی، بیر پاك و پاكیزه موسلمان بالاسی، خاریجی اؤولادی كیمی شاپقا قویوب، ایشتوت-میشتوت اوخویوب، آخیری بیر دوكتور اولوب میلتی-ایسلامدا درده دوشنه آپتئكانین نیصفی چاخیر، نیصفی سو اجزالارینی چاره بیلیب مؤمونی-دیندارین ائده قارنینی موردار وهالونكی گؤزو سورمه لی، ساققالی هنالی، الی تسبیهلی، آللاه قولو، پئیغمبریمیز اوممتی، كؤنلونده ترههوم كؤك آتیب ریشه سالان بیر كسه اصلا، ابدا بیرجه خیانت ائلمك بیلمه ییب، عؤمرونده خرید ایله فروشی دوز اولوب، میشك عوضی موشترییه روبب-بیان وئرمه یه ن، اول حضرتی-حاجوله رمئینی گؤزل عطار دوكانیندا كی، هرگیز ده سیچان هندوریندن اؤتوشوب فزله سالا بیلمه دیگی آغزی قاپاقسیز قوتولاردا كی، اون ایلدن بری ساخلانماق ایله عطری ده، تاثیری ده آرتماقدا اولوب ناخوشو هر دردو مرضدن قورتاریب، غوصه دن آزاد ائله ین ریشئیی-ختمی، كولی-بالونه، سنای-مرمه كی ، یا حببی-سلاتین، زگرگ، بئهمه نی-پیچ ایله هلیله و بلیله قالا، ائی وای! ... آلان اولمایا ازوای، گئده قیش، گله هم یای، اؤته ایل، دولانا آی، ساتا بیلمه یه مومیای، ایش اولدو بو دا هایهای! 

  میرزه علی اكبر  سابیر 

بو شعری لاتین جه اخوماق اوچون "آردینی اوخو"